ᐱᔾᔪᑎᓪᓗᐊᑕᐅᔪᖅ: ᐊᑯᕐᖓᓐᓂ 2008 ᐊᒻᒪᓗ 2010, ᒐᕙᒪᒃᑯᖏᑦ ᓄᓇᕗᑦ ᑲᑐᔾᔨᖃᑎᖃᓚᐅᖅᓯᒪᔪᑦ ᓄᓇᒥᐅᑕᓕᕆᔨᒃᑯᓐᓂᒃ ᑲᓇᑕᒥ ᐊᒻᒪᓗ 10-ᓂᒃ ᓄᓇᕗᒻᒥ ᓄᓇᓕᓐᓂᒃ ᐋᖅᑮᓪᓗᑎᒃ ᐊᐅᔪᐃᑦᑐᒥᒃ ᓄᓇᒥᒃ ᖃᐅᔨᓴᕈᑎᓂᒃ ᓄᓇᕗᒻᒥ.
ᑖᒃᑯᐊ ᓄᓇᐃᑦ ᒫᓐᓚ ᐊᐅᔾᔭᐃᕙᓪᓕᐊᔪᑦ ᑐᓴᕋᑦᓴᓂᒃ ᓂᕈᒻᒥᓐᓂᐅᔪᓂᒃ ᑎᑭᐅᒪᔪᓄᑦ ᐃᑎᓂᓕᓐᓄᑦ 15 ᒦᑕᓄᑦ. ᑖᒃᑯᐊ ᐊᑐᐃᓐᓇᐅᑎᑦᓯᒍᑕᐅᓂᐊᖅᑐᑦ ᑐᓐᖓᕕᑦᓴᐅᔪᓂᒃ ᑐᓴᕋᑦᓴᓂᒃ ᐱᔭᕆᐊᓕᓐᓂᒃ ᑎᑎᖅᑑᔭᖅᑐᓄᑦ ᐊᒻᒪᓗ ᓄᓇᓕᓐᓄᑦ ᐸᕐᓇᐅᑎᓄᑦ. ᐃᑲᔪᕐᓂᐊᕐᒥᔪᖅ ᐅᕙᑦᑎᓐᓂᒃ ᑐᑭᓯᒍᑎᒋᓗᑎᒍ ᐊᐅᓚᔾᔭᒋᐊᕈᑕᐅᔪᓂᒃ ᓄᓇᓄᑦ ᐊᐅᔪᐃᑦᑐᕐᓄᑦ ᐊᓯᔾᔨᕐᓂᐅᔪᓄᑦ ᓯᓚᒧᑦ.
ᐊᒻᒪᓗ ᑖᒃᑯᐊ ᐃᑲᔪᖅᓯᓂᖃᖅᑐᑦ ᐊᖏᓂᖅᓴᒧᑦ ᑲᓇᑕᒥ ᓄᓇᒥᒃ ᐊᐅᔪᐃᑦᑐᕐᓂᒃ ᖃᐅᔨᕐᓴᓂᕐᒧᑦ ᑲᓲᒪᖃᑎᒌᓐᓂᒃ ᑐᕌᒐᖃᖅᓱᑎᒃ ᐊᖏᓪᓕᒋᐊᕆᓂᕐᒥᒃ ᖃᐅᔨᒪᓂᖏᓐᓂᒃ ᒫᓐᓇ ᖃᓄᐃᑦᑑᓂᖏᓐᓄᑦ ᑲᓇᑕᒥ ᓄᓇᒥ ᐊᐅᔪᐃᑦᑐᕐᒥ ᐊᒻᒪᓗ ᓴᓇᕙᓪᓕᐊᓂᕐᒥᒃ ᑐᓐᖓᕕᑦᓴᒥᒃ ᖃᓄᖅ ᐆᑦᑐᕋᕐᓂᖅ ᐊᓯᔾᔨᕆᐊᖃᕐᒪᖔᖅ. ᐃᓕᓐᓂᐊᕆᐊᒃᑲᓐᓂᕆᑦ ᓄᓇᐅᑉ ᐊᐅᔪᐃᑦᑑᑉ ᖃᐅᔨᓴᖅᑕᐅᓂᖓᓄᑦ ᑲᓲᒪᔾᔪᑎᓂᒃ ᐅᕙᓂ.
ᓱᒻᒪᑦ ᐃᓱᒫᓗᓐᓇᕆᐊᖃᖅᑕᖅᑲ ᓄᓇ ᐊᐅᔪᐃᑦᑐᖅ?
ᓱᒻᒪᑦ ᐃᓱᒫᓗᓐᓇᕆᐊᖃᖅᑕᖅᑲ ᓄᓇ ᐊᐅᔪᐃᑦᑐᖅ?
ᐊᐅᔪᐃᑦᑐᖅ ᓄᓇ ᑐᓐᖓᕕᓪᓗᐊᑕᐅᔪᖅ ᐅᑭᐅᖅᑕᖅᒥ ᓄᓇᖓᓂ. ᐊᑖᓃᖅᑐᖅ ᐊᑐᓂᑦ ᓄᓇᕗᒻᒥ ᓄᓇᓖᑦ ᐊᒻᒪᓗ ᐊᑑᑎᖃᓪᓚᕆᑦᑐᑦ ᐊᐅᓚᓂᐅᔪᑦ ᓄᓇᓕᓐᓂᒃ ᐆᒪᑎᑦᓯᔪᑦ. ᐊᑦᓱᕈᕐᓇᖅᑐᑦ ᐊᑐᐃᓐᓇᐅᑎᑕᐅᔪᑦ ᓄᓇᒧᑦ ᐊᐅᔪᐃᑦᑐᒧᑦ ᐊᒻᒪᓗ ᓄᓇᒥ ᓯᑯᒧᑦ ᐱᕙᓪᓕᐊᑎᑦᓯᒍᑕᐅᓯᒪᓕᖅᑐᖅ ᐊᒥᓱᓄᑦ ᐊᐅᓚᓂᐅᔪᓄᑦ ᑎᑎᖅᑑᔭᖅᑏᑦ ᐋᖅᑭᑦᓱᐃᔩᓪᓗ ᕿᓂᖅᓱᑎᒃ ᓴᐳᔾᔨᒍᑎᑦᓴᓂᒃ ᐅᕝᕙᓗ ᐊᑑᑎᑦᑕᐃᓕᓂᕐᒥᒃ ᐊᐅᑉᐸᓪᓕᐊᔪᒥᒃ ᐃᔾᔪᒥᒃ.
ᓯᓚᐅᑉ ᐊᓯᔾᔨᕐᓂᖓ ᑕᑯᑦᓴᐅᑎᑦᓯᔪᖅ ᓱᓕ ᐊᑦᓱᕈᕐᓇᖅᑐᑲᓐᓂᕐᒥᒃ ᐊᑦᑐᐃᓂᖏᑦ ᐱᖃᓯᐅᔾᔨᑐᐃᓐᓇᕆᐊᓖᑦ ᕐᑳᖓᒍᒃᑲᓐᓂᖅ ᐊᐅᑉᐸᓪᓕᐊᓂᖏᓐᓂᒃ ᐊᐅᔪᐃᑦᑐᐃᑦ ᓄᓇᐃᑦ. ᑕᒪᓐᓇ ᐊᐅᑉᐸᓪᓕᐊᓂᖅ ᐊᑦᑐᐃᓂᖃᓪᓚᕆᒍᓐᓇᖅᑐᖅ ᒪᑭᒪᒍᓐᓇᕐᓂᖏᓐᓂᒃ ᑕᕝᕙᐅᔪᑦ ᐋᖅᑭᐅᒪᔾᔪᑏᑦ. ᐃᓱᒪᓗᓐᓇᓪᓚᕆᑦᑐᖅ ᓇᐸᔪᓄᑦ ᓂᕆᐅᒋᔭᐅᔪᓄᑦ ᐊᑯᓂ ᐊᑐᕐᓂᐊᕆᐊᖏᑦ, ᐅᕝᕙᓗ ᐊᐅᓚᓂᐅᔪᓄᑦ ᑲᔪᓯᑦᓯᐊᖏᓐᓂᖅ ᐊᑦᑐᐃᓐᓂᖃᓪᓚᕆᒐᔭᖅᑎᓪᓗᒍ, ᓲᕐᓗ ᑭᓈᓗᖃᕐᕖᑦ, ᐅᑦᓯᕖᑦ ᐊᖅᑯᑏᑦ, ᒥᑦᑕᕐᕖᓪᓗ.
ᐅᔾᔨᕈᓱᓐᓂᖅ ᒫᓐᓇ ᖃᓄᐃᑦᑑᓂᖏᓐᓂᒃ ᓄᓇᐃᑦ ᐊᐅᔪᐃᑦᑐᑦ - ᐱᖃᓯᐅᑎᑦᓱᓂ ᐃᑭᐊᖓ, ᐅᕝᕙᓗ ᓂᕈᒥᓐᓂᖓ - ᐊᑑᑎᖃᓪᓚᕆᑦᑐᑦ ᑐᓴᐅᒪᓂᐊᕐᓗᑎᒃ ᓄᓇᒥᒃ ᐊᑐᕐᓂᕐᒧᑦ ᐸᕐᓇᓐᓂᕐᒧᑦ ᑎᑎᖅᑑᔮᕐᓂᕐᒧᓪᓗ. ᐱᒻᒪᕆᐅᓗᐊᓐᖑᐊᕐᒥᔪᖅ ᐱᕙᓪᓕᐊᑎᑦᓯᑎᓪᓗᑕ ᓱᖏᐅᑎᓂᕐᒧᑦ ᐅᐸᓗᖓᐃᔭᐅᑎᓂᒃ ᑲᒪᒍᑕᐅᓂᐊᖅᑎᓂᒃ ᐊᑦᑐᐃᓂᖏᓐᓂᒃ ᓯᓚᐅᑉ ᐊᓯᔾᔨᕐᓂᖓᓄᑦ.